Na veron pasadu, kantu inséndiu florestal y txeia poi grandi preson na kumunidadis na sul di Europa y na Áfrika Osidental, fornesedu apoiu prátiku pa djuda kes ki staba na terenu, ki inklui postus portátil di diskansu pa bonberus y fornesimentu di material di imerjénsia ki Igreja di Jezus Kristu di Santus di Últimus Dias da.
Na Purtugal, undi inséndius florestal gravi sobrikarega ekipa nasional di konbati inséndiu, Igreja fornesi sais postu portátil di diskansu pa rispondi un pididu di autoridadis lokal. Kes unidadis podia ser dislokadu konformi situason di inséndiu ta mudaba, pa djuda apoia bonberus ki staba ta trabadja na rijion norti y sentru di país.
Kada spasu di diskansu tinha kamas portátil, kolxonetis, material di abrigu y inergia di jerador, pa sirbi komu un bázi suguru pa ekipas enkuantu es ta trabadjaba pa kontrola inséndiu na zonas di imerjénsia.
Na Kabu Verdi, risposta nisisáriu foi diferenti, mas igualmenti urgenti dipôs di txuba forti ki provoka txeia gravi na Mindelu, na ilha di Son Visenti.
Kazas y komérsiu fika inundadu y txeu família perdi bens, kumida y kuzas básiku di kaza. Falta di lus y águ kontaminadu agrava krizi.
Dentu di 48 óra, lideris lokal di Igreja trabadja djuntu ku autoridades munisipal pa kunpra y distribui kumida, koltxon, prudutus di ijieni y fogon. Más material foi mandadu di Praia na barku.
“Apoiu di Igreja, ku doason di kumida, koltxon y fogon, foi un grandi ajuda ki diminui sufrimentu di famílias y djuda na rikonstruson di kuzas ki perdedu,” sima Prizidenti di Staka di Mindelu, Elton Sequeira fla.
Un sugundu fázi di rikuperason ben logu dipôs, en parseria ku Organizason di Mudjeris di Kabu Verdi.
Mudjeris ki perdi ses nogósiu fetu na kaza resebi novus ekipamentu ki pirmiti-s rikumesa atividadis di jera rendimentu, moda kustura, fazi kumida y bendi na rua.
Kes-li y otus inisiativa ta fazi parti di sforsu y objetivus umanitáriu ki sta na rilatóriu di Igreja, “Rilatóriu[1] Kuida di Nisisitadus 2025´.
Rilatóriu mostra modi ki vuluntárius di Igreja kontribui ku más di 7,4 milhon di óras di sirvisu na instalasons di ben-star y autosufisiénsia, misons di sirvisu y projetus kumunitáriu na 196 país na 2025.
E ta riafirma tanbé komprumisu mundial di Igreja di Jezus Kristu di Santus di Últimu Dias ku ben-star, autosufisiénsia y ajuda umanitáriu, y e ta inklui un mensajen di Primera Prizidénsia ki insentiva psoas pa odja amor pa prósimu moda “un priviléjiu alegri”.
Es sirvisu inklui apoiu alén di imerjensias natural na rijion.
Na Portugal, pur izénplu, txeu sentru ki vuluntarius ta jeri na distribuidor di sobras di kumida Refood resebi novus jilera, konjelador y mákina industrial di laba losa, dipôs di txeu mes di kolaborason.
Ekipamentus di kuzinha y lavandaria tanbé dadu pa midjora trabadju na abrigu infantil Ajuda di Bersu, pertu di skritóriu di Igreja na Lisboa.
Dinheru ki resta uzadu pa kumpra kumida y pa djuda rispondi nisisidadis konstanti di abrigu.
Na Kabu Verdi, otus inisiativa kumunitáriu inklui doason di karteras y kaderas novu pa un skola primária na Portu Moskitu, y tanbé alimentus y kriason di ortas skolar en parseria ku Dipartamentu di Idukason na ilha di Brava.
Es dos projetu rispondi dizafius spesífiku. Na Portu Moskitu, nisisidadi era troka mobília di skola ki staba stragadu, karteras y kaderas na mau stadu, pé ferujadu y sen suguransa pa xinta.
Na Brava, un di kes ilha más pikinoti y ku más difikuldadi ekunómiku, profesoris mostra grandi priokupason ku rifeison inadikuadu na skola ki staba ta afeta kapasidadi di kriansas prendi, konsentra e ten susésu akadémiku. Tentativas ki fazeda antis di kria ortas fadja tanbé pamodi falta di águ.
Y es átus sinplis di sirvisu jera grandi dimonstrason di gratidon.
Lideris kumunitário di idukason y profesoris fla ma kes karteras y kaderas novu na Portu Moskitu rispondi un nisisidadi antigu y midjora kondison di ensinu y aprendizajen.
Vuluntárius di Refood fla menbrus y misionarius ki ta sirvi la ma ekipamentus novu midjora ijieni, diminui trabadju y pirmiti-s sirvi más psoa.
Ekipa di sentru infantil di Lisboa, Ajuda di Bersu, splika modi ki novus ekipamentus di abrigu diminui trabadju di kada dia y da-s más tenpu pa konsentra na kriansas.
Kruz Vermelha fla tanbé ma spasus di diskansu djuda manti ben-star físiku y psikolójiku d ekipas di konbati inséndiu ki sta trabadjaba na kondison difisil.
“Kel-li é nos objetivu: ki psoas odja kada individu komu un fidju amadu di Deus ku putensial divinu, y vive ku alegria ivanjelhu di Jezus Kristu óra ki ta sirvi-s — un individu, un atu di sirvisu y un novu rilason di kada bes,” konklui Élder Kevin W. Pearson, Prizidenti di Ária Europa Norti.
